Profil Caleg

Selingan Siang...

Profil C A L E G 2014


"Bang, au ma jo parlopes di pesta ni Hula-hula i," hatana.

"Bah, dang suman i daba. Alana, ba tugas manang jambar hu do i. Annon gabe sungkun-sungkun akka keluarga," alushu.

"Dang pola boha i abang. Ai adat nuaeng on, dang dirimangi jolma bei. Hulehon pe 1 juta di ho, asalma dioloi ho pangidoanhi."

Marpingkir au satongkin. Selain dang pola loja, dapotan hepeng muse. Tor huingot borukku na porlu dope minum susu. Nga tolu ari tarancam dang minum susu.

"Ba, molo ido pangidoanmu, bohama asa las roham ni oloan pe. Datung juaonhu ho," ningku, huhutma sai hubayangkon hepeng si sajuta i. "Alai huhut ni jo, boasa pola tung giot roham asa gabe parlopes ho di Ulaon i, na giot do roham manekuni Adat Batak i"

" Ah, abang on nian, hira na sosidibotoho makasudhu....!"

"Jujur, dang huboto bah!" Alushu. Memang dang huboto aha maksudna.

"Ondo Abang. Da maju do au Caleg sian Partai Holan Hata di Pileg 2014 on. Ninna anggi borum, tama do di si pakkeonku atribut ni Partai i, asa diboto keluarga na Caleg iba. Alana porlu patuduon sasahali harga diri tu keluarga dohot situan-natorop," alusna, huhut dipatuduhon simbol ni par-tai-na nalokkot di jasna.

Tarhatong au satokkin. Alai dorma ni hepeng sajuta on, ai mansai balga do i di au,  tingki on. Tor hudok ma, "Bah, songon dia nadenggan ma, anggia. Alai ikhon saonari do leononmu na sajuta i da ," ningku marpangidoan.

"Pos roham abang. Molo tobbus do au gabe Legislator, tor hubayar pe. Gaji pertamakki pe huleon tu Abang, sambil mangan hita si lapo ni si Barat."

"O, molo songoni do, dang jadi be bah. Ai si Anunang pe di dok do tu au songoni. Malah 4 juta janjinya."

Dia diam. Aku pun diam dan cepat-cepat melangkah. Alana huingot borukku na porlu minum susu. Tumagon ma huurupi Inanguda par Lapo Barat manussi piring, ai unang holan boruna si Sri Agustina Hutabarat loja mangula on dohot an. Asi roha, sotung hatop matua berengon.