PANIROI

(5)

Amangoi Amang.

Dang hola jambulan di simanjujungmu be marbottar. Misempe nunga sude. Suang songoni ra dohot akka  obut na asing na adong di pamatangmu. Alai, hatakku maon. Laos so adong muba ni roham dahot pangantusionmu. Huroha, akka sipanganon na masuk tu siubeon mi, manorus do i  gabe iting. Laos so adong do haroha tarsisa nanggo apala saotik gabe miak ni tu utohutok mi.

 Sian na jolo do tarbege hata namandok,

 “Litok aek, dapotan ma pandurung.”

  Ai dang manghail ho di aek na tio, manang di kolam renang, dangi?

Ikhon palitok-litokon ni nai Bilolang do pikkiran ni hita on. Di pajebu-jebu gulmit ni pangkataion. Songon halak sileban mandok, ikhon didramatisir do sude akka namasa. Garu soadong ni hatahon, boi do ibaen ibana mamaaen asa marsigaromakan akka namarhahaanggi, namariboto, namarale-ale. Dungi ro ma ibana attong makkail naporlu di ibana.

Jei,  tanda ma ho  otik,  naung marsaor  dohot halak ion. Patuduhon, naung gabe parhobas ho di bagas joro i. Ai dang pola napanatanata hon, nunga sanga hian las ohangku maradophonho, ala tung tama do begeon ni sipareon tonggom,  dohot naung boi ho mambaen pangalapapation di angka na tarsurat mulai sian Padan Narobi rodi tu Padan Naimbaru.

Hape...

Ba, ba, bah!

Parhusor ni roham mi ma mabaen au marangan-angan saonari on. On ma hape ate ni dok ni natua-tua :

“Balik ni hauma do onom bulan,

 anggo balik ni roha,

 sangombus ni alogo na sian papangan on do.”