PANIROI
(4)
M A N A T
Manat ho.
Unang asal dipassalpuhon ho
hatami. Tandaon mu do takkas halak manang donganmu songon dia ma hajolmaonna.
Ai tung marragam-ragam do parrohaon ni jolma di Portibi on, suang songoni ulaulana sibaen las jala sonang rohana.
Sai adong do sasahalak na las rohana, molo boi dibaen marsitombisan akka
namarhahaanggi, namariboto, dohot akka na mardongan. Ido asa adong hata ni Opputta
parjolo i, manghatahon marhite Umpama… :
“Bulung ni pangkat tu bulung ni hotang,
Ia tundal saruma musu, ia dompak sarupa
dongan”
Dang na hudok manang huorai ho mardongan manang maraleale
dohot si Peldobit Tudolgaus. Molo boi, sude nian jolmaan pardonganon. Ai sai adong
do porlu ni di sada sada tingki. Alai ikhon boi doho mameta hata, dia ma
nasipeoton, dia muse ma sibalongkonon sian roha. Alana, survey membuktikan , dang na sada, dang na dua, dang
natolu keluarga be marsirang ala ni hata mamola-mola sian si Peldobit Tudolgaus
on. Dang dao sian goar nai pangalohona. Dibotohodo lapatanni goarna i?
Umbaen
na targoar pe ibana si Peldobik Tudolgaus, ima alai sai PELlet do ibana marnonangi
sadari-sari. DOdal
panggulna di amak i huhut mangunsande tu dingding ni bagas i. BIKkas salibon ni matana i, TUjaon ngigina, jala GAnjang mUSsungna
manganggo akka hata sopisik sian donganna namangkatai, laho patolhason na
tu naasing manang sabbariba an.
Ai huparate-atehon, dung mardongan ho dohot
ibana, dang dirajumi ho lapatan ni
hadameon. Ia panghopolni tanganmu martangiang, soi nama tandina. Badia hian
doho berengon. Boi ma ho songon duta ni hadameon tu luat na asing. Alai songon
na hudok nangkin, ai boha do baenonmu mambaen dame, molo holan na suriga dohot
negatif do utohutokmu, taringot tu sude parniulaon ni halak an? Jala dang muba
ho, sai tong dipatuduhon ho, hira ho ma
unsintong, anggo akka na asing an, salama luhut.
Hape, on, dongan
do mandok on nian, anggo dang boi dope ho gabe,
“ parbahul-bahul nabolon,
siampok na pudi,
jala sipijor naganggang,”
laos gabe russur pe dolok, dang na lao boi
marsada akka nasomardomu an. Pasoma dilami na sai mandok; dame, dame, dame,
marsada, marsada, marsada, ai dialap ditaruhon ho do hata akka nahurang sian an
tu san, jadi laos boha do, mardame?
Bege, ai dang adong na holip sian
pamerengan ni Ompu Mula jadi Na Bolon. Unang songon halak Parise, soarana
gogogogo manjou Ompu i, alai satongkin nari, sai dilesengi
dongan na jolma. Ubama dohot balokkon ma akka na jongik na adong di bagasan utohutokmi. Satokkin nari, liang ni
tano nama ingananmu, ai dang tarbaenmu gabe torus monjab di Portibion. Holan
sahali do ngolu di Portibion. Dang
tarulahan.
***
Tidak ada komentar:
Posting Komentar