PANIROI
(7)
Tuit nai…
Ai laos so muba do parangem.
Tuitmu, tong songon na ujui. Sai
tongdope dipangasahon ho na hebat sude dikampudianmu. Hape, mulai sahat ho tu
Lumban namion, tanda naparadongan nian dikampudianmu, boanmu ma songon tanda-tanda,
nidokma songon pauseang, asa adong modal mu mar tuit-tuit tu sude hami na di
huta on. Ai patar do songon indahan di balanga, lapatanna, sude do na di huta
on mamboto, nanggo apala sada sendok
manang sameter amak dang adong diboan ho, alai sai tu ginjang do igungmu,
mamais-mais, sehira di toru ni kalasmu ma hami sude.
Doo…
Najolo i, najolo ma i! Nanaeng ro, dang ise umbotosa i... Alai
saonari do berengon.
Bege da. Songon sada tudosan, na
jolo boi do pira ni manuk. Alai saonari nunga gabe manuk jambe, na martaji,
jala nagogo martahuak. Inama siberengon. Jadi, sai bohado ho mangaleai ito si Ringgas
an, ai nunga tarida sude niula ni tanganna. Alani padot na mula-ulaon, nunga
markassa humaliang jabuna. 17 pangurupina, tusan tuson ditaruhon supir nama
ibana. Sude anakna na tolu i, nunga menupiri mobil sandiri. Alai nang pe
songoni, sai hobas do ibana mula-ulaon, jala sai tangi do pinggolna mambege
barita, didia ma adong dalan pangomoan. Hape, aut sura ra ibana holan di jabu
hundul-hundul, holan gaji ni amanta na pe, dang suda be allangon nasida. Ai tangkas do dibotoho,
Nunga eselon 3 amantai di DKI.
Dang na hudok, dang porlu sejarah.
Toho ma ho na jolo i dipamanja-manja Among dohot Inongmu. Alai na jolo na mai. Saonari
tanda ma dirim napuas-pais, na mansai
porsuk, ai holan uang sikkola ni anakmu pe, ikhon mangido asi-asi sian jolma
an. Ai dang sipaula hata ni natua-tua namandok, “Pantun hangoluan, tois
hamagoan.” Tois mi mambaen, siotoon amantam. Tois mi ma mambaen dang sior
rohani halak naeng marsiadapari dohot ho. Alana sai dibaen ho do di toru ni
efek mu dongan mi. Muse, homusmu sumalin, jala naeng manian sipanganon
nauntalmis masuk tu aru-aru mi tiap ari. Molo boi naeng sai di lapo ma ho mangan, asa solpu i, boi ho marnonang dohot akka na di lapo i, mambahas
sude namasa di Portibion, sian mulai sissak na so mangan, horbo di parjampalan
na sai mangugei, dohot akka politisi na so
mabiar manang maila be masuk penjara.
Anggo boi nian, alai “Dang
tandokku tandokmu, pandokku pandokmu”, aut boi do hasea ala ni tois dohot tuit,
ra, dang na oto akka na di Kementerian Pendidikan an dang dibukka Sikkola Par-Toisan manang Sikkola
Partuitan. Alai, laos so adong dope nahuboto, gabe malo, gabe mamora, gabe sangap
ala ni tuit dohot tois. Molo boti aha sai torushonon i?
Ondo, dang na paboa-boahon, na
hira na ringgas au manjaha bukku, jala ala ni i
hira na attor malo au. Nabaru hujaha do bukku ni si Guru Ethos
Indonesia, Jansen Sinamo : The Chinese Ethos. Tarhatotong au manjaha. Pola
satongkin tok ulukku, ala sai hurimangi, boasa gabe produk ni Sina mangarajai
Bangso on. Alai toppu ma husadari, cara ni halakon mulaulaon. Salut do iba. Memang
daba…toho hian, dang mungkin boi selesai ulaon molo holan angan-angan, apalagi
holan manonton sinetron. Ikhon ulahonon do sian serep ni roha. Unang golom
ria-ria. Ikhon patubuon sikap, karejo, karejo,karejo. Jei, atik beha adong
roham manjaha buku i songon gabe pemicu parrohaanmu, tuhor jala manat ma jaha.
*** (oleh
Laris Naibaho—Penulis Buku Cermin Kaca Retak)