Profil Caleg : Unang Panatanata

UNANG PA NATA-TANA

“Songon na ro ho, Bo! Naadong do na porlu?”

“Aho nian Bang, tor gogo do soaram, gabe mallobok tarottok naeng mandok sidohonon. Alana adong ma naporlu asa ro au,” ninna huhut attar unduk, jala bohina songon bohi siasian.

“ Jadi aha ma fuang, nanaeng sidohohonmu? Huhut ni nunga mangan ho, ai songon na melus huida bohim, songon bohi ni jolma na di haleon na jolo,” dokhu, sambil hupanotnoti bohinai. Alai di ulukku marpitor-pitor ma sungkun-sungkun, ai tung aha ma naeng si dohonon ni si Sabbor on, ai toppu ro na sopanagaman.

Bayon, memang jolma simarjolma-jolma do. So diboto ila. Anggo soarana marsaringar, jala boi do dipadomu Pusuk Buhit tu Jabu Hela. Malo hian ma. Boi tarhatotong akka dongan na mangkatai, gabe hira na toho manang tipak sude akka na nidoknai. Hape dibotohamu do? Onma didok hami di Medan jolma na songon pinahan lobu, ima na so segan mangitingi palakkana. Hamu majo, laos sampiate do bayon lopus, dang patolhashon hepeng ni Punguan i sahat tu sadari on. Ni hape, ni sms, ni email, dohot na parpudi, ni tonahon sian alogo habahaba, dang dialusi. Hape, tarkabar na menCALEG muse ibana, di huta nami. Agai amang…

“Dok ma bo, aha do naeng sihataanmu tu au. Aut sura dang roho nangkin, naeng borhat hian nama au tu Amplas, mangadopi ulanon Tonggo Raja, ai naeng mangoli anak ni amani Baltung na pa 11 hon i. Onma Siampudan, jadi songon na tarbalga do pesta na dibaen,” ningku patorangkon.

“ Ido daba Abang. Satongkin do guling ni arion. Sosadia nari be bulan Opat. Huhila datung so tolhas tu Abang boa-boa, na gabe Caleg au di huta,” ninna, alai bohina sai unduk.

“Bah, hebat do ho ate. Ai pantas ma dang tarida ho saleleng on di kota Medan on, na di huta do hape ho?”

“ Ido Abang. Di huta do au, laho mambuat roha ni akka keluarga, hita na samarga, lumobi odoran ni akka Tulang,” alusna.

“ Jadi aha naeng siakkupan?”

“ Dang pola adong abang. Alai molo boi, unang nian pola diboa-boa ho parangekku di Medan on, lumobi masalah ni humisik, na hujalo sian si Bolhop, SiTarila, lumobi na sian si SENGGOLAN na attar godang jumlahna,” ninna.

“ Maksudmu?”

“Haduan molo tombus do au gabe Legislator, torhupaulak pe gabe opat lompit. Pos roham! Alai sombakku Abang, sotung dipanata-nata ho joi.”

“ Boha molo so tombus?"

“ Nunga diparade anggim di jabu miak tano dohot rasun ni mossi”.

“ Lao tudia i?”

“ Ina nama soburon manggarar akka na niutang i sude. Ai sesa do utang ni namangolu molo dung tidos,” ninna.

Sip ma au jala tarhatotong. Holan hundukhon nama, asa hatop ibana laoi. Ai dang suman palao on jolma na rotu jabu ni iba. Ate dangi hamuna?***