P A N I R O I

(6)

Uba Parange mi

Dang isapan jempol on.

Alai molo gabe hira turi-turian ma on di ho, urusanku mu mai. Dang perduli au. Alai ikhon patorangku do on tuho, asa adong panatapan ni roha nang simalolongmu, jala anggiat marparbue on di ho, manang di ise petahe namanjaha on, tu joloan ni ari on.

Tolu ma anak ni Inantaon. Dua boru sada bawa. SMA kalas 2 ma Siampudan i. Semester 6 ma boruna siAkkangan i, tehnik IT di Politehnik anakna bawa i.

Nunga leleng amantana marsahit. Sahit gula. Pola nunga, sattabi, diamputasi tot ni amattai. Didok Inantai, ujui, soapala dihantushon amantai parmanganna. Ba molo male butuhana ipe asa diingot mangan. Alai sahali mangan, boi do tolu piring tamba. Pokokna dang teratur ma parmanganna. Tagi muse do minum tuak, mangallang namarmiak-miak, jala hira naso ro do ijurna mangallang sayur. Holan indahan + jagal dohot minum tuak ma nian siapari. Hape, manfaat ni sayur, sude do hita mangantusi, mansai porlu do hape tu kinerja ni jantung dohot asa denggan pencernaan.

Saonari holan di jabu nama amantai. Alai tung pe songoni, tong do holong namantong mijur sian inanta i, maradophon amanta i. Dang muba rohana nanggo apala samilting, diurus do tungganidoli nai sian ias ni rohana. Tanda do boru ni Raja inantai, ai dipatuduhon do sian pangalahona. Huroha, diajari Inongna pangintubu do ibana sian sidakdanak sahat tu dipamuli tu huta ni helana.

Ndang na mambadingkon au, songon on ma ho,  songon ma ibana. Ndang nahudok, gabe ibana ma un tama, umburju, manang na undenggan pangalahona sian ho. Ai dang tama mambeda-bedahon hadirion ni akka jolma on.  Ai dang adong hita jolma na sarupa hian, rupa, pangalaho nang nasib. Holan na manghatindanghon pangalaho ni Inanta i do au, songon dia ma perjuanganna, mangarawat Amanta nai, patupahon balanjo siapari di jabu,  dohot pasikkolahon tolussa pinomparna i.

Nang pe songoni ngalutna, tong do dang ditadinghon Inanta i ulaon paradaton. Disangahon do tingkina nasanga na boi. Molo topet dang sanga ibana mangadope pesta manang ulaon adat na asing, di tongoshon do tumpakna, manang ulosna. Didok ibana, “Molo hita halak Batak, mulai tubu  tu hasiangan on nunga ompa  adat, tung mate pe annon,  tong do di haliangi adat.”

Molo jumpang hami, laos sohea do tarbege holso sian Inanta on. Hape, molo ni hilala jala pinarrohan karejona siapari, sogot manogot i, nunga hatop hobas Ibana. Holan tarbege soara pabotohon naung Subuh sian Mesjid nunga hehe ibana sian podoman. Tor dipature ma sude nahombar tu nahinaporluhon ni amantana dohot sarapan ni akka anakna na tolu i. Dung i, dipahobas ma tiga-tigana. Dibotohamu do manang  aha tiga-tigana?

Sude ma massam ni gulamo, andaliman, asom dohot akka massam ni bumbu dapur na nihaporluon ni halak hita. Jala, ndang songon di hitaan markios manang adong lapakna. Alai diihuthon ibana do kemajuan ni jaman on, songon pola ni Pizza Hut, Delivery. Jadi nunga dibaen ibana semacam Daftar Langganan. Markareta do ibana manaruhon akka aha akka na nipesan ni langgananna. Halak hita do hampir luhut langganan na na adong di Depok dohot nahumaliangna.  Mulak tonga ari ma ibana tu jabu. Holan sahat ibana tu jabu, tor diradoti ma mangan siang ni tunggani ni doli nai, ipe asa isterahat ibana satongkin. Satongkon do. Paling ma sada-dua jom, laho mangalap gogo. Jala, takkas tangihon, sotung ninna roham, ala loja ibana namartiga-tiga, laos gabe sai marrimas mangarawat amanta i? Dang! Tong do lambok malilu parangena, mambaen sonang roha ni Among ni gelleng nai. Sai miant do di ate-atena, na arga do pe ibana, lumobi pinompar nai molo di si mangalu dope Sinonduk nai.

Ganjang do penian saritahonon perjuangan ni Inanto on. Alai on majolo. Ai holan na naeng mandok do tuho, boasa boi ibana songoni. Hape ho, sai ngarngar-ngirngir do haluar soaram, patotahon na hurang ma an dohot on, ima na hira-hira so diparate-atehon amantam ma an dohot on. Hape siapari, dungo pe,  ho nunga lewat pukul 10.00, gabe dang hea sanga dibereng ho bohi ni amantam borhat tu parkarejoanna,  jala dang pola dirimangi roham,  sanga do marsuap Amantam mi manang ndang., alana renges dope ho di podomanmu tingki borhat amantami.

Adong muse do nahira mansai alo tuhombar jabu parangem, ai manussi bajum dohot baju ni amantam pe ikhon tu laundry, soala na adong karejom, ala habis do tingkim holan manonton sinetron na sada tu sinetron na sadanari, garu ninna kabar i, sahat tu na bot ari, sai tilhang do pe maringan billok di si malolongmu. (e, tahe. Mabaor mai.)***